طريقة عمل الكلتشب

طريقة عمل الكاتشب

المقادير :-

بصلة متوسطة مقطعة مكعبات صغيرة
معلقة صغيرة توم مفروم
معلقة كبيرة مسطرة
بتاع ربع كوباية خل
كوباية سكر بني ( طبعا اللي مش هتبقي عندها هتقولي معنديش ومش هتعمله لا ممكن تحطي سكر عادي وفي حاجة كمان بتتباع عند الراجل اللي بيبيع الحرنكش والدوم اسمها كوز عسل هاتيها اطحنيها ده سكر بني برضه )
رشة ملح (اختياري)
رشة فلفل اسود (اختياري)
زيت زيتون او زيت ذرة
5حبات طماطم متوسطة الحجم مقطعين اي تقطيعة

الطريقة :-

نحط الزيت علي النار مجرد ميسخن نحط البصل ونقلب شوية وبعدين نحط التوم ونقلب انا مش عايزة لونهم يغير انا بس عايزة اطلع السكر بتاعهم وبعدين المسطردة ونقلب ثواني ونحط باقي المكونات ماعدا الطماطم وبعد كل مكون نقلب عشان يمتزج دقيقة ونحط الطماطم ونقلب ونغطي ونسيبها من 20 ل 30 دقيقة علي نار متوسطة وبعدين نطفي ونسيبه يهدي وبالبروسيسور ونطحن وبعدين نصبه براحتنا في الازازة ونحطه في التلاجة
وبألف هنا وشفا