عزومة بأقل من 20 ج

من طرف goga miro الجمعة أبريل 03, 2015 9:01 am

مكرونة بشاميل بالفراخ
و

بالصور عزومة بأقل من 20 ج

جناح كوكى مقلى

روحت اشتريت من محل الفراخ 2 ك هياكل ب 12 ج ونص كيلو مكرونة قلم ب 1.5 ج ونص كيلو لبن ب 2.5 ج و 4 بيضة ب 2.5 و1 ج بقسماط مطحون = 19.5 ج

اول حاجة قطعت الأجنحة لوحدها ال 2 كيلو عملوا حوالى 10 اجنحة كل جناح بنقسمة 2 يعنى بقوا 20 قطعة
يعنى الكمية النهائية 3 اضعاف الصورة اللى فوق دى

بعد كدة ضربت بصلة صغيرة فى الخلاط مع خل وليمون وفلفل اسود وطمطماية وفلفلاية وتوابلى المفضلة فى الخلاط لحد ما بقوا عصير وحطيتهم عالجناحات النية وسيبتهم فى التلاجة يتبلوا شوية

جيت بقى لباقى الهيكل
اولا رميت كل الجلد اللى على الرقب ومسكت الهيكل غسلتة كويس وسلقتة عادى زي الفراخ فى مية وبصلة وفلفل وملح
وادانى شوربة حلوة

بعد كدة طلعت من الشوربة وشيلت كل اللحم اللى فى الهيكل والرقب
ادانى كمية حلوة اوى
قمت محمرة بصلة متوسطة على نار هادية جدا جدا عشان تستوى وبعد كدة حطيت اللحم اللى طلعتة من الهياكل والرقب عليها وفلفل اسود وظبطت الملح وحطيت الخلطة دى على جمب والخلطة دى العصاج اللى هعمل بية المكرونة بالبشاميل

سلقت المكرونة عادى

وعملت البشاميل عادى وكلكم عارفين الطريقة طبعا واستخدمت نص ك اللبن اللى جبتة فى عمل البشاميل وكملت البشاميل بشوية شوربة من اللى سلقت فيهم الهياكل وفية تكة حلوة اوى بعملها لما بعمل بشاميل بحط فيها حبة جبنة رومى لو كان عندى فى التلاجة وهيا سخنة بتبقى البشاميل روووووووووووعة
وظبط ملح البشاميل طبعا وخلى بالكم من الملح لو حطيتوا جبنة رومى عشان مملحة وحطيت فلفل اسود
وبعد ما البشاميل برد قلبت فية بيضتين من ال 4 اللى جيتهم

عملت بعد كدة صنية المكرونة بالبشاميل عادى خالص وحطيت فى النص العصاج اللى عملتة من هياكل الفراخ ودخلتها الفرن

روحت بعد كدة جبت الجناحات من التلاجة

وحطيتها فى الاول فى دقيق

وبعد كدة ضريت البيضتين التانيين بملح وفلفل وحطيتهم فية

وبعد كدة بقسماط متبلاة بتوابلى المفضلة

وبعد كدة حمرتهم على نار هادية جدا جدا عشان يستوا مش يتحمروا بس

وعملت جمب الاكل شوربة لسان عصفور وسلطة خضرا وسلطة كول سلو وكان عندى بطاطس فارم فريتس حمرتها جمبهم