الحوواشي الاسكندراني بالصورررررررررررررررر

من طرف بارو السبت نوفمبر 19, 2011 5:33 am

مقادير العجين

كيلو ونص دقيق منخول ( بيعمل 8 ارغفة بس كبااار يعني قد صينيه 28 عيني مليانة انا )
2 كيس خميرة فورية + 2 ملعقة كبيرة سكر
2 كوب ماء ( قابل للزيادة او النقصان طبعا حسب الدقيق بتاعك)
5 ملاعق كبار زيت زيتون او زيت عادي ( بس الزيتون احلى )
5 ملاعق كبار لبن بودرة ( بيطري العجين )
رشة ملح ( مااعرفش ايه لزمتها بس تعود )

ودي صورة المقادير مع بعض

نبدا بقى نجيب كيسين الخميرة نفضيهم في نص كوب ماء دافئ وعليهم ملعقتين كبار سكر ونغطي ونسيبهم في مكان مقفول الفرن مثلا بتاع 10 دقايق لحد ما الخميرة تعلى
لو الخميرة ماعليتش معاكي وزي ما سبتيها ارميها وحطي غيرها عشان ما تكتميش العجين ويبقى تعبك عالفاضي

ده شكل الخميرة لما عليت

الطريقة

حنحط كل المكونات على بعض وعليهم الخميرة ونظبط الماية بحيث العجينة تمسك وتلم في بعضها ما تلزقش في ايدك
نعجن كويس وكتير اي عجينة لو عجنتيها كتير حتبقى طرية والنتيجة احسن

وده شكلها بعد العجن

حنغطيها بكليننج فلم ونسيبها تخمر ساعة ( انا بخمر العجين على مرتين يعني ساعة دلوقتي وساعة بعد التقسيم تمام )

ودي بعد ما خمرت ساعة

وهنا قسمت العجين 16 كورة ( 8 وش الرغيف و 8 قعره )

وهنا غطيته وسبته يخمر ساعة كمان

بصوا كبر ازاي

ندخل بقى على الحشو

انا عملت 5 لحمة و 3 سدق

مقادير اللحمة

لحمة مفرومة وبصل وبقدونس و2 فلفل اخضر وملح وفلفل اسود

مقادير السدق

سدق وفلفل اخضر وطماطم بضربهم في الكبة عشان السدق يتفرم
ومافيش ملح وفلفل اسود عشان السدق فيه بهارات بتاعته

وده شكلهم بعد ما عملتهم وكورتهم

السدق في اليمين واللحمة في الشمال

نبدا بقى نعمل الرغيف

محتاجين طبعا نشابة لو مافيش ممكن رجل مكنسة بهزر طبعا بيتهيالي مافيش بديل للنشابة
ودقيق
وعضلات

وبعدين نفرد بالنشابة طول وعرض طبعا

ونعمل واحدة تانية ونحطها على جنب

وهنا حطينا الحشو

وبعدين غطينا بالوش

وبعدين ضفرناه انا شفت الفران بيعملها مش حعرف اشرحها والله

انا هنا عملتهم وفصلت بينهم بكياس وشيلتهم في الفريزر ووقت ما نعوز نعمل نطلع وفي الفرن على طول وهو تلج يعني

وبعدين نسويه هو بيستوي في 20 دقيقة تقريبا واخر 5 دقايق بفتح الشواية

في الرف الوسطاني درجة حرارة متوسطة

فيه تكاية شفت بتاع الحوواشي بيعملها جربتها لقيتها خليت الرغيف اطري
وهو في الفرن افتحي عليه ورشي ماية ودخليه تاني

ده استوى كدة

ودي صورة تانية